Letare mai spedide (Lettera mai spedita)

Conte di Natasha Bondarenko (in friulano) dal libro 'Pensâ a art', 2009

“Ai 9 di Novembar dal 1995. Milan   

Mandi, ‘ma’!

Purpùr tu tu continuis a bachetâmi pal gno mût di clamâti ‘ma’, jo non lu gambiarai mai.

No rivi, scusimi, par me tu sês simpri ‘ma: di pocjis peraulis e decise, fuarte e propotente, tu tu jeris simpri chê ingjenue despote, che e veve sperance tai miei vueits di memorie e cu la rispueste simpi pronte che non si podeve fâ in altre maniere, che i timps e jerin dûrs e che jo o jeri masse vivace. Al pues jessi che tu vedis cancelât cun proposit i tiei erôrs e no tu schercis su chest argoment disint che mi soi insumiade dut. ‘Ma’, la schene mi dûl inmò. Chê puare schene di frute di trê agns, non dal dut formade e leade tal schenâl de cjadree par tignîmi ferme… tu tu crodevis che cul passâ dal timp o varès dismenteât par vie de aparente lizerece dal gno caratar o pe mê profonde positivitât tai confronts dal mont (cuissà parcè che dopo dut, ancje chê e fâs part di me).

Mi visi mâl la tô muse, mi visi mâl ce che tudisevis, ma mi visi ben che no tu jeris mai. O, no… nol è propìt cussì. Tu jeris, tu cjaminavis devant di me, assente, preocupade, rabiose; tu bruntulavis, ma no cun me. Tu jeris cussì par vie dal to lavôr. E jo, leade ae cjadree par no disturbâti, o zuiavi cu lis primis baiis – i lapis. I lapis dome neris tant che la tô assolude e rigorose avarizie sentimentâl. Tal profont dal gno piçul cûr mi ribelavi, e lis rompevi dutis, lis matitis. O volevi il colôr, za di piçule mi plaseve il colôr.

Plin tu âs di imparâ il lapis – tu insistevis e tu spacavis il lapis in doi, tornant a fâ la ponte e tornant a metimi in man la matite. E dopo, cuant che di chê man al vignive fûr un disen, tu lu judicavis e tu disevis che o vevi talent che tu, cence capî che tu za in che etât tu mi fasevis tant che un larie, une larie dal to mistîr, che ti osservave di lontan e e copiave il to mût di lavorâ. Viodistu come che mi visi ancje chescj particolârs? Ma no mi va di visâmi de tô man… Le visi une vore pesante cuant che e cirive di dismovimi e o jeri strache dopo vot oris di sfuarçs par contentâti e cuant che tu provavis a fermâ il gno vaî convulsîf e cence fin. Ce robe strane… Ma o ai propit volût scancelâ chest particolâr. Come ancje, plui indevant tai agns, o ai scancelât lis tòs distruzions: tu sbregatis ducj i miei disens che no ti placevis, disens che no partignivin ae tô comprension artistiche e ti disevin che jo non jeri te. Tu tu sês simpri stade une vore fotografiche e pôc espressive e jo, biel che o cressevi i cirivi di jemplâ la part che ti mancjave cui sintiments e lis espressions di dolôr e di aviliment, copiant i grancj dal passât.  Un jenfri chescj al è Vrubel. I voi dal pinsirôs personaç diabolic su la cime de montagne dal Caucaso cun ator i lilà e la romantiche regjine Tamara, orgoiose e maestose, mi fasevin vaî di gnot. 

Ma cuant che o jeri plui grande, la sensibilitât e je deventade ribelion e la espression de mê lote interiôr si è cjatade tes musis di Gottuso… tal cors di chei agns mi plaseve une vore Gottuso. E tu, su Vrubel, no tu vevis nuie ce dî, ma su chel altri (tu jeris dure tant che il KGB), disint che la piture capitaliste no parten ae nestre concezion e ae nestre politiche. Cjare ‘ma’! Renato Gottuso al jere un comunist! Almancul chest tu vevis di cognossilu par mieç des rivistis che ti rivavin simpi!    

Ma pensant miôr, no je la tô ‘mentalitât cuadrade’ che mi à fat mâl, ma une vore di plui il fat che daspò de mê partence in Italie, lis numerosis telis e cartonuts che jo o vevi piturât, tu ju âs firmâts cul to non disint che jo no podevi piturâ cussì e che a jerin cuadris tiei. Tal principi mi soi rabiade un grum, ma dopo, cul passâ dal timp o ai capît che al è miôr cussì: slontanantmi di te e des tôs posizions o fasevi restâ lontans ancje i bruts ricuarts.

Cjare ‘ma’! Ti scrîf cheste letare dopo cinc agns di cidinôr, parcè che, a part la grande pôre dal to judizi, capint che un to scufiot al pues jessi une maledizion che no ai pôre, al è rivât il moment di diti la veretât. Chê altre dì o ai decidût di batiâmi intune glesie ortodosse di Milan. Lu sai che par te al sarâ un colp dûr parcè che tal cors di ducj chescj agns la tô uniche fede e jere chê dal partît comunist, che o crôt che tuo tu crodis plui. Jo o crôt che ancje mê none, atee fin te ponte des ongulis, si voltarà te fuesse. Nono, però, no. Lui prin de rivoluzion, al à frecuentât il siminari, deventant pope. Al jeri l’unic te nestre famee che al crodeve e daspò al à fat fente di jessi ateu par no vignî fusilât. Cussì, in gracie de su previdente ‘salvece’, tu sês nassude tu e, dopo, jo. Me cheste decision di vê une crôs picjade tal cuel le ai cjapade jo, ma no par fâ content il nono, che nol è plui. E jo no sai se o crôt… ma ti zuri – come che o pues fâ dome che jo – che o cirarai almancul di lâ dondje a une robe che o sint dificile di razonzi pe mê spiritualitât sparniçade.

E dopo e je ancje une altre robe. Cheste ti fasarà veramentri inrabiâ, ma ancje câs la tô man pesante no rivarà mai fin in Italie. O ai decidût: no cjantarai plui! Al è stramp, ma cul passâ dai agns o ai capît une robe: no podint cjantâ, tu tu volevis a ogni cost che o cjantâs jo, fasint fente di nuie di ce che disevin i miedis. Tu cognossevis benissim il brut stât dal gno cuel par vie des malatiis cronichis. Purpûr il gno grant sfuarç par fâti plasê, o soi stade stade a clucî sui ûfs dal passât par une vore di timp. Fevelant cun sinceretât, mi mancjaran i lauts de int e i bis cence fin.

E cumò lis mês cuardis vocalichis a àn ‘il virus de ribelion’ e no funzionin plui.

Jo lu sai che tu sês buine di maledîmi ancje par cheste mê decision, ma o speri cundut il cûr che cheste maledizion, viodude la distance, no mi rivi, parcè che cjare, mam, o ai decidût di tornâ a piturâ! Ma no come che tu mi âs insegnât tu. No sai se e je stade la tô assence e la mancjance de influence tes mês decisions, o Milan, che a part il fat che je une pignate artistiche bulinte, e je ancje une bielissime citât o ,semplicementri, la Italie…

Intant o ai cjatât cualchidun che al vûl scoltâ i miei dubis, che, a part la mê insigurece aparente, a cressin e a aumentin simpri di plui. Un gno amì, un psicolic, cognossint la mê infanzie, ma à dit che o starès miôr se une dì a rivassin lis tôs scusis. E chest mi à fat tant ridi! O ai cirût di spiegâi che cheste peraule no fâs part dal to vocabolari. Se ancje une piçule scuse, parziâl, o almancul calchi segnâl di bande tô che le fasès pensâ… la scuse… no mi displaserês. Ma come che o ai spiegât  ancje a lui, i siums a restin simri siums. Alore, mi diseve che no ai di puortâti rancûr e continuâ a amâti come une fie e ame sô mari. Ma lui nol sa che cence savêlu lu stoi fasint za, tignintmi lontane di te. Un miâr di chilomentris di distance, cul passepuart scjadût di agns e cjatant in chest une valide scuse par no tornâ mai plui a cjase tô.

O speri che prin di rispuindi tu spietarâs cualchi zornade e tu fasarâs une lungje riflession.

O stoi simpri in pinsîr par te. Une grande bussade.

Natasha

P.S. Ah! Mi dismenteavi… îr o ai piturât il gno prin cuadri astrat. Cussì cence nancje pensâ plui di tant, dome cul pinsîr, chel che à volût fa la mê man; cualchi segn di spatule che mi ricuardave la letare ‘B’ dal alfabet cirilic. E chest mi à fat vignî i sgrisui… o crôt di vê capît in part che al è chel che o volevi fâ, che al è chel che o volevi dî, esprimimi e butâ fûr ce che no rivi a capî dentri di me. No sai se chest at al voleve significâ alc, ma il risultât al è stât fuart: o ai vût subit un compradôr (tes mês condizions economichis ancje chest nol fâs mâl). Ma jo no vûl vendi chest cuadri. Lu ten par me, o vûl che mi ricuardi par simpri cheste zornade magjiche de disubidience concetûal e un adiu mentâl ae injustizie e ae prepotence subide di te.

P.S. Ai 20 di Zenâr dal 1996, Pordenon

‘Ma’! No ai spedide cheste letare parchè che la pôre e jere plui grande de curiositât di cognossi la tô reazion.

A voltis tu sês simpatiche. Par telefon no tu mi domandis cemût che o stoi te gnove cjase e cemût che mi cjati te gnove citât, se o ai polsât e se o soi felice, tu mi domandis se o cjanti inmô…

No cjanti plui! Ma tu no tu puedis savêlu parcè che cheste letare e jo inmô achi, tal gno casset…

Cumô, bielzà di un an, dome o pituri. Ma nancje chest no tu puedis savêlu… i, forsit, no o vuei che tu lu savedis…

Une fuarte bussade. (In spiete di une domande semplice: cemût stâstu?)

Natasha

P.S. Ai 10 di Mai dal 1999, Bruniere

O soi juste tornade de Austrie dulà che o ai fat la mê prime mostre tal forest e o ai cjatât la tô letare plene di rabie e ramanzinis… percè che no ti dîs plui nuie.

No sai cemût dîti che bielzà di cetancj agns no cjanti plui, ma te piture o ai cjatât la mê vite… tu tu rideris a plene vôs, come che tu sâs fâ dome che tu… e cuss’ no sai se cheste mê convinzion e sedi convincente ancje par te. Ma a chest pont o ai di dîti… che o soi contente… e di là dal fat che chest no ti interesse, o speri che une dî tu mi perdonarâs.

Une grande bussade.

Natasha

P.S. Ai 23 di Dicembar dal 2000, Udin

Cjare mame!

Ce curiôs: ti ai clamade mame… Chê altre dî, cirint par telefon di fâti i auguris par Nadâl, o ai capît che il me non no ti dîs plui nuie. Tu mi âs scambiât pe tô vicine di cjasee tu mi âs domandât se gno di al è tornât a cjase… Mamute mê. Jo no ai fiis. Ma il sfuarç che tu tu âs fat par ricuardâ la mê vôs al è stât grandononon. La siore che vîf cun te e che e viôt di te, mi sigure che no ti mancje nuie. Ma il gno cûr si strice bessôl.

O stoi scrivint e o capis che cheste letare e je deventade inutile. E ancje la mê pôre di te si è fate inutil.

Dentri di me inmô nol sucêt nuie, ma la sai che cul massâ dai agns o varai il pintiment di no vêti spedît cheste letare tal moment just, di no vê vût il coragjio par frontâti e spiegâti lis resons de mês sieltis cussì radicâls, di no vê vude un ultime tô ramanzine, che e podarâ un to ultin consei, che al è stât di fat chel che mi à judât te vite a decidi di fâ l’artist, come di simpri tu sês stade tu.

Une bussade grande…

Natasha”